Vrasja e gazetarit, Gjykata e Stambollit nis gjykimin në mungesë për 20 të dyshuarit

Gjykata e Stambollit ka hapur sot gjykimin në mungesë për 20 zyrtarë sauditë për vrasjen e gazetarit, Jamal Khashoggi, e cila nxiti zemërim ndërkombëtar dhe dëmtoi imazhin e sundimtarit të Arabisë Saudite. Khashoggi u vra në konsullatën Saudite në Stamboll në tetor 2018, në kohën kur ai po  kërkonte dokumente për martesën e tij.

Disa qeveri perëndimore, si dhe CIA, besojnë se Princi i Kurorës Saudite Mohammed bin Salman urdhëroi vrasjen – akuzë e cila është mohuar nga zyrtarët sauditë.

E fejuara e të ndjerit Khashoggi, Hatice Cengiz, e priti atë për orë të tërë në hyrje të konsullatës ndërsa, sipas prokurorëve, ai u mbyt dhe trupi i tij  u copëtua. Prokurori  akuzon dy zyrtarë të lartë saudit, ish nënkryetarin e inteligjencës Ahmed al-Asiri dhe ish këshilltarin e gjykatës mbretërore Saud al-Qahtani, për nxitje të “vrasjes me paramendim”.

Të pandehurit po gjykohen në mungesë dhe nuk ka gjasa të dorëzohen nga Arabia Saudite. Në dhjetor një gjykatë saudite dënoi me vdekje pesë persona dhe tre me burg për vrasjen, por familja e Khashoggi më vonë thanë se ata falnin vrasësit e tij. 

Aktivistët e të drejtave të njeriut shpresojnë se gjykata e Stambollit do të nxjerrë një mandat arresti ndërkombëtar për të dyshuarit, i cili mund të çojë në  arrestimin e të dyshuarve nëse udhëtojnë jashtë vendit.