La Liga dhe Serie-A, Barcelona rikthehet te fitorja, humbin sërish Interi e Roma

Pas dy barazimeve radhazi, Barcelona është rikthyer tek fitorja, duke mundur në transfertë Villarealin me rezultatin 1-4. Ndeshja nisi mirë për skuadrën e Quique Setién, që e gjeti golin që në minutat e para përmes një autogoli të Pau Torres.

Gerard Moreno barazoi më pas për Villarrealin, por Luis Suarez dhe Antoine Griezmann shënuan që në pjesën e parë. Në pjesën e dytë në listën e shënuesve vendosi emrin dhe Ansu Fati, i cili realizoi golin që vulosi dhe rezultatin përfundimtar 1-4.

Pas këtij suksesi, Barcelona shkon në kuotën e 73 pikëve, 4 më pak se Real Madridi i vendit të parë, që në takimin e së dielës mundi minimalisht 1-0 ekipin e Atletic Bilbaos me golin e kapitenit Sergio Ramos.

Në kampionatin italian ka zhgënjyer Interi, që u përmbys nga Bologna. Skuadra e Antonio Contes krijoi iluzionin e një suksesi pas golit të Rumelu Lukakut në pjesën e parë, por në pjesën e dytë ishte Bologna që shënoi dy herë, duke i venitur në këtë mënyrë çdo ëndërr të zikaltërve për vendin e parë, pasi diferenca me Juventusin është plot 11 pikë.

Napoli në anën tjetër mundi Romën me rezultatin 2-1. Skuadra e Gennaro Gattusos ishte dominuese ndaj kryeqytetasve, por goli i parë erdhi në minutën e 55-të, me Jose Callejon që gjeti rrugën e rrjetës. Armeni Henrik Mkhitaryan barazoi rreth 5 minuta më vonë, mirëpo Roa nuk kishte kthjelltësinë e duhur për ta përmbysur rezultatin dhe në minutën e 82-të, Lorenzo Insigne i ndëshkoi ata duke i dhënë fitoren Napolit.

Tashmë Roma vë seriozisht në lojë prezencën në kupat e Evropës pasi Milani është vetëm 2 pikë pas tyre.