Sulmohet baza ruse në Krime, viktima e të plagosur

Kievi zyrtar deklaroi pasditen e së martës se ka goditur me raketa një depo municionesh ruse, në një bazë ushtarake në gadishullin e aneksuar të Krimesë.

Sipas autoriteteve lokale, nga sulmi një person ka vdekur dhe 5 të tjerë janë plagosur, përfshirë një fëmijë.

Ndërkohë, dëshmitarë nga zonat pranë vendit të ngjarjes, në qytetin Novofedorivka, thanë se u dëgjuan 12 shpërthime.

“Është herët të flasim për motivet e ngjarjes. Komisioni hetimor do ta zbardhë atë. Masa kryesore tani është siguria e perimetrit”, tha Sergey Aksyonov, administrator i Krimesë.

Ndërkohë, sipas një deklarate të Ministrisë ruse të Mbrojtjes, nuk ka pasur asnjë sulm ndaj depos së municioneve dhe asnjë dëmtim material në bazën Saky.

Por rrjetet sociale treguan frikën e shkaktuar tek turistët, të cilët formuan një karvan të gjatë automjetesh në përpjekje për t’u larguar nga zona.

LEXONI GJITHASHTU:

• Medvedev: Rusia do t’i arrijë qëllimet e saj në Ukrainë
• SHBA-të japin edhe një miliard dollarë ndihmë ushtarake për Ukrainën