Testimi: Administrata e paaftë të dallojë të dhënat personale

Rrjedhjet e të dhënave personale kanë qenë një problem i hasur shpesh 2 vitet e fundit.

Por punonjësit e administratës publike, ata të cilët duhet të ruajnë këtë informacion, e kanë vetë të paqartë se çfarë quhet e dhënë personale, cila pjesë mund t’u jepet palëve të treta dhe cila është sensitive.

Kjo, sipas një anketimi të kryer nga komisioneri për mbrojtjen e të dhënave personale në 121 institucione shtetërore. Gjysma e të pyeturve janë punonjës të administratës qendrore, pjesa punonjësve të bashkive dhe institucioneve të tjera të pavarura. Por kryesisht individë që kryejnë përpunim të dhënash.

Vetëm 20% e të pyeturve janë trajnuar sesi menaxhohen të dhënat personale sipas ligjit. Rreth 35% mendojnë se baza ligjore në përpunimin e të dhënave është urdhri i shefit apo opinion i kryeministrit. Rreth 40% e administratës beson se emri dhe adresa janë të dhëna sensitive.

Madje, ka nga ata që e konsiderojnë normale që dokumente apo informacion personal t’u jepet dhe të afërmve, kur i kërkojnë ato në emër të një individi. Apo dhe të shpërndajnë të dhëna personale me e-mail tek një grup personash që presin data për të marrë një shërbim të njëjtë.

55% e punonjësve të pyetur nuk arrijnë të identifikojnë një e-mail të parregullt dhe 45% nuk janë në gjendje të kuptojnë objektivat e hakerave për marrjen e të dhënave personale. Për këtë arsye, komisioneri Dervishi e sheh si domosdoshmëri trajnimi e administratës për të mësuar më shumë mbi të dhënat që përpunojnë dhe administrojnë.

LEXONI GJITHASHTU:

• ‘Nxirrni listën e spiunëve’, Kuvendi kërkesë Autoritetit për administratën
• Rama: Procesi i tenderimit nuk do kryhet më nga administrata dhe ministritë