Jugperëndimi i Francës në rrezik për vatra të reja zjarresh

Temperaturat e larta dhe thatësira në rritje po çojnë në një rrezik të lartë të zjarreve të reja në Francën jugperëndimore, thanë sot zyrtarët, raporton Reuters.

Zjarrfikësit nga Gjermania, Rumania dhe Greqia janë aktualisht në terren për të ndihmuar Francën të luftojë zjarret në rajonin Gironde, i famshëm për verën e tij Bordeaux, si dhe në fronte të tjera, duke përfshirë dhe Brittany në veriperëndim.

Rreziku i zjarreve të reja është “shumë serioz” duke pasur parasysh kushtet e motit, tha prefektura e Gironde.

“Dita ka të ngjarë të jetë e ndërlikuar pasi temperaturat vazhdojnë të rriten dhe lagështia vazhdon të bjerë, duke kërkuar që ne të qëndrojmë vigjilentë dhe të mobilizuar,” tha një zyrtar i lartë lokal në një konferencë për shtyp.

Në jugperëndim priten temperatura deri në 40 gradë Celsius, ndërsa në pjesën më të madhe të Francës parashikohen temperatura të larta, njoftoi shërbimi zyrtar francez i motit Meteo France.

Sipas deklaratës, vala e të nxehtit, zyrtarisht e treta në Francë këtë verë, duhet të dobësohet të shtunën dhe të përfundojë të dielën me stuhi. Rreth 7,400 hektarë pyje u shkatërruan në Gironde, dhe 10 mijë njerëz u evakuuan për shkak të zjarrit.

Këtë verë, përveç Francës, vende të tjera evropiane u përballën me një sërë zjarresh vdekjeprurëse, të shkaktuara nga temperaturat e larta rekord dhe thatësirat në të gjithë kontinentin. Më shumë se 1 mijë vdekje janë raportuar në Portugali dhe Spanjë për shkak të nxehtësisë dhe zjarreve.

LEXONI GJITHASHTU:

• Zjarrfikësit në Francë luftojnë zjarrin ‘përbindësh’ pranë Bordo