Serie-A, Milani përmbys 4-2 Juventusin, shtohen shanset për një vend në kupat e Evropës

Milani fitoi me përmbysje 4-2 ndeshjen e së martës mbrëma ndaj Juventusit në “San Siro” duke konfirmuar dhe një herë se ata kanë tjetër marsh pas rikthimit të aktivitetit sportiv.

Ndonëse pjesa e parë përfundoi me rrjeta të paprekura, ndërsa në pjesën e dytë, u shënuan plot 6 gola.

Kuqezinjtë gjetën forcat që të përmbysnin kampionët e Italisë, të cilët shënuan 2 herë me Rabiot e më pas Ronaldon. Më tej ishte radha e të besuarve të Stefano Piolit që të nisin përmbysjen e çmendur.

Fillimisht Ibrahimovic shënoi nga pika e bardhë e penalltisë, ndërsa më pas Kessie dhe Leao shënuan 2 herë në pak sekonda, duke i dhënë epërsinë Milanit 3-2.

Në minutën e 80-të kishte vend dhe për golin e Rebiç, që vulosi rezultatin final.

Ky ishte suksesi i katërt në pesë ndeshjet e fundit për Milanin, që tashmë e sheh veten përkohësisht në vendin e 5-të me 49 pikë.

Vëmendja e kuqezinjve tashmë është në ndeshjen e radhës, e cila do të jetë me Napolin në transfertë.

Në takimin tjerët. Lazio nuk ia doli të merrte pikë në transfertën me Leçen. Pavarësisht se kryeqytetasit shënuan të parët, vendasit shënuan 2 herë, duke u dhënë një tjetër goditje shqiponjave.