Dënohet financiari i Trump, shpallet fajtor për mashtrim dhe evazion fiskal

Shefi i financave të kompanisë së ish-presidentit Donald Trump është shpallur fajtor për mashtrim dhe evazion fiskal nga një gjykatë e Nju Jorkut.

Allen Weisselberg, që ka shërbyer si shef i operacioneve financiare të “Trump Organization”, akuzohej për fshehjen e më shumë se 1.7 milionë dollarëve.

Ai pritet të dënohet me 5 muaj në burgun famëkeq “Rajkers Ajllënd” dhe do t’i duhet të kthejë paratë që u detyrohet tatimeve.

Nga ana e tij, Trump nuk është akuzuar. Ish-presidenti e ka quajtur hetimin penal të prokurorisë së Manhatanit ndaj kompanisë së pronave të patundshme të familjes së tij një “gjueti shtrigash”.

Çështja lidhet me një skemë 15-vjeçare që sipas prokurorëve ndihmoi drejtuesit e organizatës së Trump të shmangnin shlyerjen e taksave mbi përfitimet e korporatës nga shit-blerja dhe dhënia me qira e apartamenteve dhe automjeteve luksoze.

Hetimi synonte të verifikonte nëse Weisselberg dhe drejtues të tjerë kishin marrë përfitime pa i raportuar ato tek institucionet.

Në seancën e mbajtur, 75-vjeçari pranoi përfshirjen e tij në skemën e mashtrimit dhe përfitimet e paligjshme që rridhnin prej saj.

Weisselberg, i konsideruar një nga ortakët më besnikë të Trump, punoi për ish-presidentin për rreth 50 vjet. Ai e la detyrën si shef i operacioneve financiare të cilën e mbante që prej 2005-s vitin e kaluar, kur u arrestua.

Edhe kompania e ish-kreut të shtetit është gjithashtu e pandehur në këtë proces, me avokatët e saj që pretendojnë pafajësinë.

LEXONI GJITHASHTU

• Gjysma e votuesve republikanë mbështesin Trumpin pas kontrollit të FBI-së
• Kontrolli ndaj Trump, prokurorët refuzojnë të publikojnë detajet e mandatit