Notre Dame do të ndërtohet sipas modelit origjinal gotik

Katedralja e njohur “Notre Dame de Paris”, e cila u përfshi nga flakët një vit më pare, do të restaurohet sipas modelit origjinal gotik të shekulli të 19-tw, me përpjekjen për të qënë identikisht e njëjtë me pamjen që të gjithë njohin.

Lajmi u bë me dije nga presidenti francez, Emmanuel Macron, duke i dhënë fund edhe spekulimeve, sipas të cilave katedralja do të rindërtohej duke u bazuar në stilin modern.

“Premtoj se Notre Dame do të rindërtohet brenda 5 vitesh. Do të bëjmë gjithcka që të përmbushim këtë afat”është shprehur presidenti Macron

Kreu i Elizesë fitoi sigurinë dhe bindjen se ishte e nevojshme që katedralja të restaurohej duke ruajtur madhështinë e saj të mëparshme, pas një mbledhjeje të Komisionit Kombëtar të Trashëgimisë dhe Arkitekturës, bazuar në mendimet e ekspertëve.

“Presidenti u besoi ekspertëve dhe para-aprovoi në skicë projektin e paraqitur nga arkitekti kryesor (Philippe Villeneuve), i cili planifikon të rindërtojë majën e katedrales në mënyrë identike,” thuhet në njoftimin e Elysée.

Ky projekt propozon një restaurim të përgjithshëm të katedrales dhe majës së saj sa më afër pamjes që kishte para zjarrit të 15 Prillit 2019. Një ngjarje që shkaktoi reagime të shumta në të gjithë botën e ku në vetëm dy ditë për restaurimin e ndërtesës ikonike të Francës u mblodhën 900 milionë euro.

Zyrtarët e Kishës shpresojnë se Notre dame De Paris do të rihapet në vitin 2024 kur kryeqyteti francez pritet të pres Lojërat Olimpike.