Makron e Merkel garantojnë ndërmjetësimin e dialogut, pas video-konferencës me Hotin dhe Vuçiçin

Presidenti francez, Emanuel Makron, dhe kancelarja gjermane, Angela Merkel, kanë publikuar një deklaratë të përbashkët për mediat pas video-konferencës të mbajtur mëngjesin e ditës së sotme mes kryeministrit të Kosovës, Avdullah Hoti; presidentit serb, Aleksandar Vuçiç; Përfaqësuesit të Lartë të BE-së për punët e Jashtme dhe Sigurisë, Josep Borrell; dhe me të dërguarin e posaçëm të BE-së për dialogun Prishtinë-Beograd, Miroslav Lajçak.

Vuçiç dhe Hoti ranë dakord që ta rinisin dialogun Beograd-Prishtinë, i cili është ndërprerë që nga nëntori i vitit 2018.

BE do të vazhdojë ta ndërmjetësojë këtë dialog, me synimin për të normalizuar marrëdhëniet Kosovë-Serbi nëpërmjet një marrëveshjeje gjithëpërfshirëse, përfundimtare dhe të detyrueshme ligjërisht.

Kryeministri kosovar dhe presidenti serb pranuan të thellojnë bashkëpunimin në fusha të ndryshme të parashikuara nga Procesi i Berlinit, si pjesë e masave që shërbejnë për të ngritur besimin midis dy palëve.

Pjesëmarrësit diskutuan hapat e radhës të dialogut Kosovë-Serbi, të ndërmjetësuar nga BE. Diskutimet do të nisin më 12 korrik, nëpërmjet një videokonference, ndërsa takimi i parë fizik do të  organizohet në Bruksel, më 16 korrik, nga Përfaqësuesi i Lartë i BE-, Borell, dhe i dërguari i posaçëm, Lajçak.

Presidenti Makron dhe kancelarja Merkel u bënë thirrje presidentit Vuçiç dhe kryeministrit Hoti që të bëjnë përparime domethënëse me negociatat në muajt në vazhdim.

Duke qenë se normalizimi i marrëdhënieve midis Kosovës e Serbisë është mjaft i rëndësishëm për sigurinë dhe stabilitetin e rajonit, si dhe për perspektivën europiane të dy vendeve, Merkel dhe Makron vazhdojnë të garantojnë mbështetjen dhe ndërmjetësimin e BE-së, si dhe, nëse do të jetë e nevojshme, janë gati të mbajnë një tjetër samit teksa vazhdohet me negociatat.