Shpallet rezultati përfundimtar i zgjedhjeve në Kosovë, Vetëvendosje konfirmohet e para

Komisioni Qendror i Zgjedhjeve ka shpallur rezultatin përfundimtar të zgjedhjeve të parakohshme parlamentare në Kosovë. Nga numërimi i 844 mijë votave të vlefshme, Lëvizja Vetëvendosje është konfirmuar si parti e parë në vend.

Vetëvendosje do të ketë 32 deputetë në legjislaturën e re të Kuvendit, ndërsa Lidhja Demokratike e Kosovës ka fituar 29 vende në Kuvendin e Kosovës.

Partia Demokratike e Kosovës, renditet e treta, ndërsa Koalicioni i Aleancës për Ardhmërinë e Kosovës me Partinë Socialdemokrate, ka mbetur e katërta.

Nga 20 vendet e rezervuara për komunitetet pakicë në Kuvendin e Kosovës, 10 deputetë i ka fituar Lista Serbe.

Ndërkohë, koalicioni Nisma Socialdemokrate – Aleanca Kosova e Re – Partia e Drejtësisë nuk ka fituar votat e nevojshme për t’u bërë pjesë e Kuvendit, duke marrë vetëm 4.98 për qind të votave.