Jahti me vlerë 76 milionë euro i oligarkut rus do të shitet në ankand

Jahti me vlerë marramëndëse prej 76,571,431 euro i një oligarku rus, i goditur nga sanksionet, do të dalë në ankand nga qeveria e Gjibraltarit të martën.

Kjo do të jetë një nga anijet e para luksoze që do të shiten që kur u vendosën kufizime ndaj qindra rusëve të pasur pas pushtimit të Ukrainës nga Vladimir Putin.

Axioma, me një gjatësi prej 72.5 metra po shitet për një bankë investimi amerikane, JP Morgan, e cila pretendon se pronari miliarder i jahtit, Dmitry Pumpyansky, i detyrohet më shumë se 20 milionë dollarë.

Anija, e cila përmban gjashtë kabina luksoze për mysafirë, një pishinë, një dhomë kinemaje 3D, palestër, xhakuzi dhe një banjë të pajisur plotësisht, u ndalua pasi u ankorua në Gjibraltar në muajin mars.

Ndërsa dhjetëra super jahte të dyshuara se janë në pronësi të oligarkëve nën sanksion, janë ndaluar ose konfiskuar në të gjithë botën, Axioma është i vetmi që është vënë në shitje.

LEXONI GJITHASHTU

• Superjahti i themeluesit të Whatsapp ankorohet në portin e Durrësit
• Jahti pëson defekt pranë Divjakës, organizohet operacioni i shpëtimit