CAS vendos të hënën, Manchester City pret heqjen e dënimit nga Gjykata e Arbitrazhit Sportiv

Gjykata e Arbitrazhit Sportiv do të marrë të hënën vendimin në lidhje përjashtimin 2-vjeçar që Manchester City ka marrë nga UEFA.

Diçka të tillë e ka njoftuar vetë CAS përmes një deklarate. Qeveria e futbollit europian mori masa ndaj Manchester City duke e akuzuar për shkelje të rregullave të ‘fair play’ financiar dhe për mosbashkëpunim gjatë hetimeve.

Krahas përjashtimit 2-vjeçar nga kompeticionet ndërkombëtare, anglezët u gjobitën edhe me 30 milionë euro.

Pas vendimit që u mor në muajin shkurt, City apeloi me pretendimin se çdo veprim është kryer brenda rregullave dhe pret drejtësinë nga CAS.

Muajin e shkuar, Gjykata e Arbitrazhit dëgjoi për tri ditë me radhë mbrojtjen e “citizens”, të cilët besojnë shumë se do të marrin pjesë në Ligën e Kampioneve.

Nëse CAS do i japë të drejtë UEFA-s, atëherë City mund të humbasë afro 100 milionë paundë nga mungesa në arenën ndërkombëtare.