Qeveria franceze miraton 8 miliardë euro rritje pagash për punonjësit e shëndetësisë

Rritjet e pagave për punonjësit e spitaleve, të cilat kapin shifrën 8 miliardë euro morën dritën e gjelbër nga qeveria franceze të hënën.

Kryeministri i vendit,  Jean Castex, e përshkroi nismën si “një çast historik për sistemin tonë shëndetësor”.

Marrëveshja, të cilën e kanë pranuar shumica e sindikatave, erdhi pas shtatë javësh negociatash intensive.

Duke vlerësuar përpjekjet e mjekëve kundër COVID-19, Castex shtoi se ky ishte “vlerësimi i parë dhe më i konsiderueshëm i atyre që kanë qenë në vijën e parë të luftës me pandeminë”.

Punonjësit e sektorit shëndetësor në Francë u cilësuan si heronj gjatë pandemisë ku qytetarët kudo nëpër vend duartrokitën punën e tyre nga ballkonet dhe dritaret në orën 8 të mbrëmjes çdo pasdite gjatë ditëve të izolimit.

Por shumë të tjerë u nxitën të protestonin në muajt e fundit duke kërkuar paga më të mira dhe më shumë financime për spitalet.

Marrëveshjet qeveri-sindikata japin 7.5 miliardë euro për infermierët, sanitaret dhe punonjës të tjerë jo-mjekësorë, si teknikët dhe stafi administrativ, që kryesisht do të përdoret për të financuar një rritje bazë të pagës mujore net me 183 euro.

Përveç kësaj, 450 milionë euro janë ofruar për doktorët, kryesisht për të shtuar kompensimin e paguar tek praktikantët që punojnë vetëm në spitale publike. Praktikanët mjekësorë dhe studentët kanë në dispozicion 200 milionë euro.

Marrëveshja ka tërhequr kritika nga disa organizata shëndetësore, ku një sindikatë që përfaqëson doktorët, Action Praticiens Hôpital, e denoncoi lëvizjen.

“Ky është një hap përpara, por i mungojnë shumë elementë që të nënshkruhet,” tha Jacques Trevidic, president i APH, në një deklaratë për shtyp, duke bërë thirrje për një raund të dytë negociatash, me një fokus më specifik në orët e punës.