Protestat masive, Presidenti i Bolivisë jep dorëheqjen pas 13 vjetësh në pushtet

Presidenti i Bolivisë Evo Morales është detyruar të japë dorëheqjen pas 13 vitesh në pushtet. Moralez është dorëzuar përpara protestave masive qytetare kundër rizgjedhjes së tij, me të cilat u bashkuan së fundmi edhe ushtria dhe policia.

Më herët Morales kishte shprehur synimin për të thirrur zgjedhje të reja, pasi monitoruesit ndërkombëtarë sugjeronin se zgjedhjet e tetorit duhet të anuloheshin. Por politikanët, ushtria dhe policia i bënë thirrje atij të tërhiqej.

“Kam vendosur të dëgjoj miqtë e mi në federatën për çështjet sociale, në atë për tregtinë dhe në Kishën Katolike, për të dhënë dorëheqjen nga posti i presidentit”, u shpreh në atë kohë Morales.

Pa mbështetjen e ushtrisë boliviane, që deklaroi se duhet të largohej për hir të stabilitetit, presidenca e Morales ishte e humbur.

Morales, që ishte presidenti i parë indigjen i Bolivisë, ka qenë në detyrë që prej 2006-s. Por përveç zgjedhjeve të kontestuara, në dyshim ishin vënë edhe kredencialet e tij pro-demokracisë. Në një referendum të vitit 2016, shumica kishte votuar kundër heqjes së limitit të mandateve presidenciale, por Morales e kishte shpërfillur rezultatin.