Menaxhimi i të dhënave, Gjykata Evropiane rrëzon mekanizmin SHBA-BE

Gjykata Evropiane e Drejtësisë hodhi poshtë të enjten vlefshmërinë e një mekanizmi të përdorur nga mijëra kompani që dërgojnë të dhëna në Shtetet e Bashkuara, duke mbështetur shqetësimin e keqpërdorimit të tyre të ngritur nga aktivisti i privatësisë, Max Schrems, në përplasjen e tij me Facebook.

E ashtuquajtura Mburoja e Privatësisë BE-SHBA u krijua në 2016-n për të mbrojtur të dhënat personale të evropianëve kur transferohen përtej Atlantikut për qëllime tregtare. Gjykata rrëzoi edhe marrëveshjen paraardhëse, Porti i Sigurt, e arritur në 2015-n.

Megjithatë, gjyqtarët mbajtën në fuqi një tjetër mekanizëm për transferimin e të dhënave, i njohur si Klauzolat Kontraktuale Standarde, por theksoi se entet mbikëqyrëse të privatësisë duhet të pezullojnë transferimin e të dhënave jashtë BE-së nëse mbrojtja e tyre nuk mund të garantohet.

Qindra mijëra kompani, përfshirë Facebook, gjigantë industrialë dhe prodhues makinash i përdorin klauzolat në fjalë për të transferuar të dhënat evropiane në mbarë botën, për shërbimet që variojnë nga infrastruktura elektronike, ruajtja e të dhënave dhe pagesat e deri tek financat dhe marketingu.

Çështja mes Facebook dhe Max Schrems përfundoi në Gjykatën Evropiane të Drejtësisë në Luksemburg pasi aktivisti sfidoi përdorimin e klauzolave nga rrjeti social, duke deklaruar se nuk bënte mjaftueshëm për mbrojtjen e të dhënave.