Çmim kufizues naftës ruse, G7 merr vendimin, Moska mbyll rubinetet e gazit

Vendet e G7-s vendosën të premten të aplikojnë një çmim kufizues për naftën ruse, për të reduktuar të ardhurat e Moskës dhe për të kufizuar impaktin e luftës në Ukrainë tek çmimet e energjisë.

Vendimi është marrë pavarësisht se më herët Kremlini kishte paralajmëruar se nuk do t’i shesë naftë kujt vendos kufizimin në fjalë.

Në orët e mbrëmjes, “Gazprom” bëri të ditur se “Rrjedha e Veriut”, gazsjellësi kryesor rus drejt Evropës, nuk do të funksionojë ditën e shtunë.

Kompania ka deklaruar se shkak është bërë një rrjedhje në një nga stacionet e saj dhe për pasojë transporti i gazit do të ndalet tërësisht.

Bëhet fjalë për një lojë të njohur të Moskës, e paralajmëruar nga Dmitry Medvedev, nënkryetar i Këshillit të Sigurisë dhe ish-president i Rusisë: “Nëse BE do të vendosë çmimin kufizues, atëherë Evropa do të mbetet pa gaz rus”, kishte deklaruar Medvedev.

Nga ana tjetër, Bashkimi Evropian e ka quajtur lëvizjen një “pretekst fals” dhe “cinizëm” nga ana e Kremlinit.

Pritja për rinisjen e “Rrjedhës së Veriut” ditën e shtunë kishte çuar në rënie të lirë çmimet e gazit me 11.7 për qind në bursa.

Sa i takon kufizimit të vendosur nga G7-a, mbetet ende për t’u parë se cila do të jetë kuota e çmimit dhe se si do të reagojnë blerësit e mëdhenj të naftës ruse si India dhe Kina.

LEXONI GJITHASHTU:

• ‘S’ia kemi nevojën Rusisë’, Rama: Shqipërisë nuk i duhet gazi rus
• Shkëputja nga gazi rus, BE-ja nis planin për të reduktuar varësinë nga Moska