Presidenti Thaçi kujton të rënët në betejën e Rahovecit më 19 korrik 1998

Presidenti i Republikës së Kosovës, Hashim Thaçi, ka kujtuar sot dëshmorët e lirisë të rënë në betejën e Rahovecit më 19  korrik 1998.

Kreu i shtetit me një shënim në faqen e tij zyrtare në “Facebook” e cilëson këtë betejë si një ndër betejat më të mëdha që bëri Ushtria Çlirimtare e Kosovës përballë pushtuesit.

Ai shton se, ballafaqimi me ushtrinë dhe policinë serbe tregoi heroizmin e madh të eprorëve dhe ushtarëve, të cilët luftuan deri në fund për çmimin e lirisë.

“Më 18 korrik 1998 në Rahovec filloi njëra ndër betejat më të mëdha të Ushtrisë Çlirimtare të Kosovës. Ballafaqimi me ushtrinë dhe policinë serbe tregoi heroizmin e ushtarëve dhe eprorëve të Ushtrisë Çlirimtare të Kosovës. Në betejën e Rahovecit ra heroikisht komandanti Agim Çela, dëshmorët Sadik Shala, Afrim Krasniqi, Hamdi Berisha, Gani Paçarizi, Habib Berisha, Liman Gegaj dhe Ramadan Morina.

Në shenjë hakmarrjeje për humbjet në betejë, ushtria dhe policia serbe vrau shumë civilë të pafajshëm. Lavdi dëshmorëve dhe martirëve të rënë për liri!”, shkruan Thaçi.