Dialogu me Serbinë, Hashim Thaçi: Emërimi i Hysenit si koordinator është produkt ndërshtetëror

Presidenti i Kosovës, Hashim Thaçi, e ka përshëndetur emërimin e Skënder Hysenit në pozitën e koordinatorit shtetëror për dialogun me Serbinë.

Në një reagim në “Facebook”, Thaçi shprehi besimin e tij në përvojën e ish-ministrit të Jashtëm, në kohën kur presidenti aktual ishte kryeministër.

“E mirëpres emërimin e ish-kryediplomatit të Kosovës, z. Skënder Hyseni, koordinator shtetëror për dialogun ndërmjet shtetit të Kosovës dhe Serbisë. Emërimi i z. Hyseni është produkt i koordinimit ndërshtetëror. Kam besim të plotë se përvoja tri dekadëshe e z. Hyseni në procesin e lirisë dhe shtetformimit do të jetë jetike për fazën finale të dialogut për njohjen reciproke ndërmjet Kosovës dhe Serbisë”, shkroi ai.

Megjithatë, presidenti i kujtoi Hysenit se mandati i tij është angazhimi për marrëveshjen përfundimtare mes Kosovës dhe Serbisë, duke kundërshtuar sërish dialogun teknik.

“Z. Hyseni ka mandat për të negociuar për marrëveshjen përfundimtare politike ndërmjet Kosovës e Serbisë dhe jo për t’u bërë pjesë e proceseve shterpe teknike. Jam i bindur se me angazhimin dhe përpjekjet e tij, z. Hyseni do të arrijë ta ndërtojë konsensusin e nevojshëm politik ndërmjet pozitës dhe opozitës në të mirë të Republikës së Kosovës”, vazhdoi presidenti.

Pasditen e së martës, kryeministri Avdullah Hoti emëroi Skënder Hysnin në pozitën e koordinatorit shtetëror për dialogun me Serbinë.

Në rolin e ri, të enjten në Bruksel, Hyseni pritet të zhvillojë takim me palën serbe, ku sipas Hotit, do të “nis drafimi i marrëveshjes për njohje reciproke dhe normalizim marrëdhënies mes Kosovës dhe Serbisë”.

Lexoni gjithashtu: 

Hoti cakton Skënder Hysenin koordinator për dialogun, NISMA kërkon sqarime