Përmbytje apokaliptike në Pakistan, kryeministri: Disa pjesë të vendit duken si det

Pjesë të Pakistanit po duken si “det” tha kryeministri i Pakistanit, Shehbaz Sharif, gjatë vizitës që i bëri më 7 shtator disa prej pjesëve të goditura nga vërshimet.

Vërshimet në Pakistan kanë mbuluar me ujë pothuajse një të tretën e këtij shteti, teksa numri i viktimave ka arritur në 1.343.

Nga vërshimet janë prekur 33 milionë njerëz nga popullsia prej 220 milionë banorësh. Për këtë fatkeqësi faji i është hedhur ndryshimeve klimatike, teksa qindra mijëra persona kanë mbetur pa shtëpi dhe autoritetet pakistaneze kanë vlerësuar se dëmet e shkaktuara nga vërshimet arrijnë në vlerën e të paktën 10 miliardë dollarësh.

“Nuk mund ta besoni shkallën e shkatërrimit që është këtu”, tha Sharif për mediat pasi vizitoi provincën jugore Sind. “Ka ujë gjithandej, deri ku të shohin sytë. Thjesht është si det”.

Qeveria pakistaneze u ka dhënë para të gatshme familjarëve të viktimave të vërshimeve në vlerë të përgjithshme prej 313.90 milionë dollarësh. Ekzekutivi po ashtu është zotuar se do të blejë tenda për familjet e zhvendosura, tha Sharif.

LEXONI GJITHASHTU:

• Pakistani nën ujë nga përmbytjet, mbi 1600 viktima
• Përmbytjet në Pakistan, një e treta e vendit është nën ujë