Vëllezërit Marquez festojnë titujt kampionë në qytetin e lindjes

Vëllezërit Marc dhe Alex Marquez kanë fituar titujt kampion bote në Moto GP dhe Moto 2 në të njëjtin sezon. Kjo është herta e dytë që ata arrijnë diçka të tillë.

Fundjavën e shkuar Alex ndoqi hapat e vëllait të tij të madh pasi arriti të shpallej kampion në Moto 2, në pistën e Malajzisë. Ndërsa Marquez arriti të siguronte titullin e gjashtë kampion në Moto GP në pistën e Tailandës.

“Sigurisht që është një vit i veçantë, është diçka fantastike. Në vitin 2014 festuam titujt në Moto 3 dhe Moto Gp. Në atë kohë unë thashë që është diçka që nuk mund të përsëritet sërish, por ja që ndodhi prap. Jam shumë i lumtur për vëllain tim pasi ka punuar fort dhe tani është momenti për të festuar”, është shprehur kampioni i botës në Moto GP, Marc Marquez.

Në sezonin e ardhshëm Alex Marquez do të garojë në kampionatin e Moto 2, ku do të kërkojë mbrojtjen e titullit kampion.

“Është një ëndërr e bërë realitet kështu që tani po jetoj vërtet momente fantastike. Kam mundësinë që të festoj me familjen dhe miqtë e mi. Është mjaft e veçantë për mua”, është shprehur Alex Marquez, kampioni i botës në Moto 2.

Pilotët spanjollë festuan titujt kampionë në qytetin e lindjes, ku u pritën jashtzakonisht mirë dhe me ovacione nga tifozët.