Zaptimi i Liqenit Artificial, si u shtuan ndërtimet dhe katet e pallateve në 30 vite

Në 30 vitet e fundit, Parku i Liqenit Artificial në Tiranë është tkurrur nga të gjitha anët, është ndërtuar dhe një pjesë përvetësuar në pronë private.

Me vendime qeverish, urdhra ministrash dhe kryetarë bashkish, mushkëria e Tiranës është asfiksuar nga betoni.

Para vitit 1990, parku ku ishte një hapësirë e bukur, e gjelbër, e paprekur në një kodër të bukur në vazhdim të kryeqytetit, sot çfarë ka mbetur nga parku është fshehur nga pallatet e larta prej betoni me arkitekturë të shëmtuar.

“Nga sheshi ‘Nënë Tereza’ ti shihje parkun e liqenit, ti tani sheh vetëm kullat e jo pemë. Nuk duket më vizualisht.”- shprehet Ened Mato, ambientalist.

Kjo hartë tregon se si u ndërtuan ndër vite hapësirat përgjatë parkut dhe brenda parkut. Dikur parku ishte i gjelbëruar nga të gjitha anët, tani nuk ka më asnjë kufizim të qartë mes gjelbërimit dhe betonit.

“Fakti se shumë pak veta e shohin nga qyteti se ku është parku, nuk ka më një kufi të qartë të parkut. Pallati i kuq brenda parkut, mendohet se do të jetë referimi i ndërtimeve tani. Nga ana e ekonomikut e kemi parë se si u përjashtua një hapësirë e madhe e parkut.”- thotë Mato.

Shkatërrimi nuk ndalet, së fundmi janë planifikuar projekte të mëdha ndërtimore, anash parkut dhe brenda parkut, një pjesë ka filluar të zaptohet.

“10-15 vitet e fundit ai është kafshuar në forma të ndryshme tinëzare. Publiku nuk ka informacion fare se çfarë do të bëhet aty”,- përfundon ambientalisti.

LEXONI GJITHASHTU: 

• Qytetarët protestojnë për mbylljen e parkut të liqenit në Tiranë