Forcohet ligji i ndërtimit, ndërhyrje edhe në kodin penal, sanksione me burg për abuzuesit

Pasojat e ndërtimeve jashtë standardeve që u evidentuan pas tërmetit të 26 nëntorit kanë detyruar qeverinë të ndërhyjë në ligjin për “planifikimin dhe zhvillimin e territorit” duke sanksionuar rolin dhe detyrimet që nga projektuesi, zbatuesi e deri tek kolaudatori.

Projektligji ka kaluar në qeveri dhe tashmë i shkon për miratim parlamentit për t’i dhënë fund abuzimeve në ndërtim, shkeljeve të lejeve, ndërtimeve pa leje dhe cenimeve të çdo forme të mjedisit, tokës si dhe pronës publike e private.

“Ky projektligj synon të sanksionojë dhe të vendosë në kushte ligjore të gjitha raportet mes profesionistëve, fushat e përgjegjësisë mes tyre; cili mban përgjegjësi për secilën pjesë, që nga ndërtimi deri tek kolaudimi”, tha ministrja e Infrastrukturës dhe Energjisë, Belinda Balluku.

“Një risi e kësaj paket është përfshirja në një listë të zezë e të gjitha subjekteve që zhvillojnë veprimtari ndërtimore në kundërshtim me ligjin apo lejen, duke i shpallur të paligjshëm për 5 vjet”, u shpreh ministrja e Drejtësisë, Etilda Gjonaj.

Krahas ndërhyrjeve në kodin penal, ministri i brendshëm Sandër Lleshaj kishte edhe një porosi për policinë e shtetit.

“Është me rëndësi të theksoj se policia do të ketë kujdes edhe për zyrtarët përgjegjës, pra nuk do të merret vetëm me ata që bëjnë mëkate në fushën e ndërtimit, por dhe me zyrtarët që mbyllin sytë apo bashkëpunojnë me ata që shkelin ligjin”, u shpreh ministri i Brendshëm, Sandër Lleshaj.

Në këtë luftë sipas Lleshajt, një peshë të rëndësishme ka edhe Inspektorati Kombëtar i Mbrojtjes së Territorit.