Suedia mban zgjedhjet, garë e ngushtë mes së majtës dhe radikalëve të djathtë

Qytetarët suedezë po hedhin votat për zgjedhjet e përgjithshme, me garën për të formuar qeverinë e re që nuk mund të jetë më e ngushtë.

Kryeministrja në detyrë, social-demokratja Magdalena Andersson do të mund ta bëjë këtë nëse partia e saj fiton shumicën e vendeve në Parlament, ose nëse do të jetë në gjendje të formojë një koalicion të qëndrueshëm me partitë e majta ose të qendrës.

Por nga ana tjetër mund të ketë një koalicion të djathtë të drejtuar ose nga partia më e madhe konservatore, të Moderuarit, ose nga partia në ngjitje Demokratët Suedezë, të drejtuar nga radikali Jimmie Akesson, i njohur për qëndrimin e tij kundër emigrantëve.

Nëse të Moderuarit, të udhëhequr nga Ulf Kristersson renditen të tretët, prapa Demokratëve Suedezë, pozicioni i tij si lider mund të vihet në diskutim.

Rritja e ndjeshme e dhunës së bandave kriminale, që nuk hezitojnë të përdorin armë zjarri, është çështja kyçe e këtyre zgjedhjeve, të cilësuar si procesi elektoral më i shëmtuar në histori.

LEXONI GJITHASHTU

• Sekretarja britanike jep dorëheqjen pas zgjedhjes së Truss si kryeministre
• Liz Truss zgjidhet kryeministrja e re e Britanisë së Madhe