UEFA nuk ka dhënë ende aprovimin se ku do të luhet ndeshja Shqipëri-Francë

Ndeshja mes Shqipërisë dhe Francës, e programuar për t’u zhvilluar në datën 17 nëntor, nuk e ka ende një stadium të përcaktuar nga UEFA. Qeveria e futbollit nuk e ka vendosur ende stadiumin ku do të zhvillohet kjo sfidë, duke mos caktuar as ndonjë stadium alternativ.

Ekskluzivisht për Euronews Albania, UEFA ka dhënë një përgjigje dhe thotë se nuk është caktuar stadiumi ku do të luhet kjo përballje.

“UEFA po e monitoron nga afër punën në stadium, e cila është në fazën e saj finale. Miratimi përfundimtar pritet në momentin e përshtatshëm”.

UEFA lë të hapur mundësinë e licencimit të Arenës Kombëtare, por nga ana tjetër ekziston rreziku që kjo përballje mund të mos luhet në stadiumin e ri, për sa kohë nuk është marrë  ende licenca.

Pak ditë më pare, presidenti i Federatës Shqiptare të Futbollit theksoi se stadiumi do të jetë gati për ndeshjen e fundit kualifikuese të kampionatit evropian.