Berlin, automjeti del nga kontrolli dhe hipën mbi trotuar; 7 të plagosur

Një makinë që po udhëtonte me shpejtësi humbi kontrollin dhe hyri në një zonë këmbësorësh mëngjesin e së dielës në Berlin.

Mercedesi i zi hipi në trotuar në sheshin Hardenburg, në pjesën qendrore të Berlinit, pranë kopshtit zoologjik dhe stacionit të metrosë.

Policia deklaroi se nuk ka të dhëna që episodi të ketë pasur motive politike apo fetare dhe shtoi se drejtuesi i mjetit, një 24-vjeçar, është arrestuar.

“Ajo që dimë për momentin është se aksidenti u regjistrua në mëngjes. Një 24-vjeçar që po drejtonte mjetin humbi kontrollin teksa merrte kthesën në një kryqëzim për shkak të shpejtësisë së lartë dhe përplasi 7 persona, tre prej të cilëve janë plagosur rëndë, ndërsa 4 të tjerët lehtë. Për momentin nuk ka të dhëna për një sulm me motive fetare dhe ne po e procedojmë çështjen si një aksident”, deklaroi Martin Halweg, zëdhënësi i policisë së Berlinit.

Ndërkohë, nuk dihet nëse autori i aksidentit ka qenë nën ndikimin e alkoolit apo drogës.

Ngjarja ndodhi pranë një zone ku në vitin 2016 një agresor i lidhur me militantët islamikë vërshoi me kamion në një treg Krishtlindjesh, duke vrarë 12 persona.