Mbretëresha Elizabeth II përcillet në banesën e fundit

Në sytë e dhjetëra mijëra njerëzve, arkivoli me trupin e pajetë të mbretëreshës Elizabeth-a e Dytë mbërriti pasditen e së hënës në banesën e fundit, në kështjellën Windsor.

Monarkja do të varroset në një ceremoni private në kishën Saint George, pranë bashkëshortit të saj, dukës së Edinburgut.

Më herët, rreth 800 të ftuar morën pjesë në shërbesën fetare.

Në kështjellën Windsor, teksa arkivoli transportohej, ishin të pranishëm anëtarët e familjes mbretërore, si mbreti Charles i Tretë dhe princi William.

E hëna ishte gjithashtu kulmi i një dite historike, gjatë të cilës familja mbretërore ishte rrethuar nga rreth 500 liderë dhe zyrtarë të huaj në meshën e mbajtur në Westminster Abbey, pa harruar qindra mijëra njerëz të rreshtuar gjatë procesionit në rrugët e Londrës.

Mes personave që ndoqën ceremoninë ishin edhe ish-kryeministrat e Britanisë së Madhe që janë ende gjallë, të cilët kanë shërbyer gjatë 7 dekadave qeverisje të Elizabeth-ës së Dytë, monarkja më jetëgjatë në historinë e Mbretërisë së Bashkuar.

Kryeministrja aktuale, Liz Truss lexoi një fragment të shkrimeve të shenjta gjatë meshës.

Pas shërbesës, arkivoli i mbretëreshës u transportua për në kështjellën Windsor, duke kaluar në rrugët e Londrës.

Arkivoli i Elizabeth është ulur tashmë në zgavrën mbretërore të kishës Saint George, në kopshtin e kështjellës që ndodhet jashtë Londrës.

LEXONI GJITHASHTU:

• Detaje nga ceremonia e varrimit të mbretëreshës Elisabeth II