Vllaznia në kërkim të ëndrrës, vajzat shkodrane synojnë kualifikimin në Champions

Për herë të parë, një skuadër shqiptare në futboll ka mundësinë të luajë në grupet e UEFA Champions League.

Bëhet fjalë për vajzat e Vllaznisë, të cilat presin në dy ndeshje ukrainaset e Vorskla Kharkiv.

Për trajnerin e shkodraneve, Nikolin Leka ka ardhur momenti që të shkruhet historia. Për të, faktorët favorizues janë grupi i krijuar mes vajzave dhe mbështetja e tifozerisë.

“Kemi një të mirë se boshtin e ekipit e kemi të njëjtë prej vitesh në skuadër. Afrimet e duhura që ka bërë dhe presidenca janë harmonizuar dhe normalisht që nesër na pret një ndeshje e vështirë por ne nuk do dorëzohemi dhe do shkojmë drejt atij objektivi që të kualifikohemi. Kemi një fushë që e njohim shumë mirë dhe kemi përballë dhe një tifozeri të zjarrtë si tifozeria e Vllaznisë që ne do na ndihmojë shumë,” – u shpreh Leka.

Kualifikimi mes 32 skuadrave më të mira është objektivi kryesor i vajzave shkodrane. Afrimet e reja në merkato kanë shtuar besimin për kualifikim.

“Kemi punuar shumë mirë këto kohë si në fazën përgatitore po ashtu edhe me kalimin me ekipin sllovak. Besoj se ekipi është në gjendjen më të mirë pasi kemi shumë prurje dhe kemi punuar gjatë gjithë kohës me vajzat që kanë ardhur të lidhen sa më shumë me grupin dhe lojtaret që janë në ekip dhe të paraqitemi sa më mirë,” – tha Megi Doçi, futbolliste e Vllaznisë.

“Për ne është një ndeshje shumë e rëndësishme. Të mërkurën do luajmë një ndeshje historike pasi mendoj se jemi shumë afër kualifikimit në grupe dhe mendoj se është shumë e rëndësishme për ne. Në fillimet tona ëndrra ka qenë 32-shja ndërsa tashmë objektiv i joni është bërë gjashtëmbëdhjetëshja. Natyrisht që çdo futbolliste e ka ëndërr që të luaj një herë në grupe,” – u shpreh Esmeralda Franja, kapitene e skuadrës.

Për shkak të luftës në Ukrainë, është arritur marrëveshja që të dyja ndeshjet të luhen në Shkodër. Takimi i parë luhet këtë të mërkurë në stadiumin ‘Loro Boriçi’. Me qëllim që shkallët e stadiumit të jenë plot, hyrja do jetë falas.

LEXONI GJITHASHTU:

• Vllaznia kërkon fitoren ndaj Egnatias, Josa: Ndeshje vendimtare