Kosovë, kampionati në rritje, specialistët nota pozitive për sezonin që sapo u mbyll

Kampionati kosovar i futbollit ka pësuar një rritje veçanërisht në edicionin e fundit, diçka që konstatohet edhe nga specialistët e futbollit. Për herë të parë në garat ndërkombëtare do të marrin pjesë tre skuadra.

“Mendoj që është kampionati pas luftës më interesanti që ka qenë. E ceka edhe më herët kanë zakonisht në kampionatet e kaluara kanë luftuar dy skuadra për titull, ndërsa deri tash në xhiron e parafundit nuk është ditur se kush do të shpallet kampion”, thotë Erdin Hashani, ekspert i futbollit.

Specialisti Ardian Llumnica beson se nëse progresi do të vijojë të jetë i njëjtë, shumë shpejt liga kosovare “do të jetë një nga më të fortat në rajon”.

“Mendoj se nëse vazhdojmë me këtë ritëm, me këtë ngritje të nivelit dhe të cilësisë mendoj që brenda tre katër vitesh do të bëhemi një nga kampionatet më faktorë në rajon”, thotë Llumnica.

Analisti Erdin Hashani e cilësoi si kampionatin më të fortë pas lufte edicionin që sapo u mbyll.

Drita, si kampione, do të luajë në raundin para eliminator të Champion League, ndërsa Gjilani i vendit të dytë dhe Prishtina si fitues e Kupës do të angazhohen në Europa League.