Uragani godet Floridën. Shteti amerikan, në luftë me natyrën dhe përhapjen e COVID-19

Bregu lindor i Floridës ka regjistruar një rritje të nivelit të detit dhe shirave, teksa stuhia “Isaias” po godet shtetin.

Pavarësisht paralajmërimeve që të mos gënjehen nga rënia e fuqisë së uraganit në stuhi tropikale, njerëzit kanë dalë në plazhe duke marrë përsipër rrezikun.

Nga ana  e tyre, autoritetet mbyllën parqet dhe zona të tjera të rrezikuara nga COVID, si dhe lidhën palmat në mënyrë që të mos shkulen nga era.

Ndërkohë, guvernatori i shtetit ka paralajmëruar për ndërprerje të energjisë elektrike.

Zyrtarët vendas u bënë thirrje njerëzve që edhe gjatë strehimit nga stuhia të përpiqen të ruajnë distancimin social, për të parandaluar përhapjen e virusit.

Qendra Kombëtare për Uraganët, me bazë në Majemi, deklaroi se epiqendra e “Isaias” ishte në bregun lindor të Floridës, por pritet të lëvizë në brigjet e Xhorxhias dhe në jug të Atlantikut.