Kalifornia në flakë, mbi 8.300 hektarë të djegur; rreth 7.800 të evakuuar

Zjarrfikësit në Kaliforni vijojnë betejën me zjarret masive në lindje të Los Anxhelesit, që kanë detyruar disa mijëra persona të braktisin shtëpitë e tyre.

Mbi 1.300 zjarrfikës, të mbështetur nga helikopterë dhe avionë, kanë luftuar me flakët që ranë pak ditë më parë.

Një pjesë e vatrave të zjarrit janë në rrëpira dhe terren të thyer duke e bërë të vështirë aksesin për makinat zjarrfikëse.

Autoritetet lokale deklaruan se pikërisht për shkak të terrenit të vështirë është shumë e rrezikshme për zjarrfikësit që të përpiqen të rrethojnë zjarrin.  

Ndërkohë, banorët që janë urdhëruar të braktisin zonën janë rreth 7 mijë e 800 persona.

Zjarret ranë ditën e premte me dy vatra të afërta me njëra-tjetrën, në atë që njihet si Lugina e Qershisë, në afërsi të qytetit Beaumont.

Që prej atëherë, flakët janë zgjeruar duke përfshirë 8 mijë e 302 hektarë tokë, të favorizuara nga temperaturat e larta, mungesa e lagështirës dhe bimësia e thatë.