Bajram Çekorja ishte në kërkim nga policia kur vrau 19-vjeçarin

Policia e Shkodrës ka identifikuar dhe shpallur në kërkim si të dyshuarin kryesor për vrasjen e 19-vjeçarit Erjon Xhenje, Bajram Çekoren, djalin e Ismet Çekores i cili mbeti viktimë e një atentati pak metra nga banesa e tij.

Por a mund të parandaloheshin këto vrasje nëse policia do të vepronte?!

Nëse kthehemi pak pas në kohë, në 25 gusht të këtij viti, Bajram Çekorja u hetua nga oficeri i policisë gjyqësore si autor i dyshuar i atentatit ndaj Alban Bruçit së bashku me një tjetër shtetas ndërsa me datë 27 gusht u shpall zyrtarisht në kërkim.

Që nga kjo datë Çekorja ka rezultuar si i tillë deri në mbrëmjen e 22 shtatorit ku policia e Shkodrës e “rishpalli në kërkim” për vrasjen e Erjon Xhenjes. E thënë ndryshe, policia nuk arriti të binte në gjurmët e Bajram Çekorës ndërsa ai arriti madje të kryente një vrasje gjatë periudhës që policia duhet të ishte në ndjekje të tij.

Krimi në Shkodër duket se është shumë më i fuqishëm se sa strukturat e policisë të cilat në asnjë rast nuk ishin në lartësinë e duhur për parandalimin e ngjarjeve kriminale.

Mamaja e 19-vjeçarit të vrarë, ditën e enjte shpërndau një mesazh në media pasi ndihej e pasigurt, jeta e saj rrezikohej ndërsa kërkonte ndihmën e policisë e cila ende nuk e kishte marrë në mbrojtje familjen e saj ndonëse banesat e autorit të dyshuar, me të viktimës nuk janë as 100 metër larg njëra-tjetrës.

Deri kur do të vijojë kjo situatë askush se di, ndërsa askush nuk mban përgjegjësi për këto krime të paralajmëruara që fare mirë mund të ishin parandaluar, madje dhe jeta e 19-vjeçarit Erjon Xhenje nuk do të këputej në lule të rinisë.

Nga janari deri më tani 6 ngjarje kriminale kanë goditur Shkodrën dhe vetëm në rastin e fundit policia ka një autor të dyshuar.

LEXONI GJITHASHTU:

• Kamerat e sigurisë zbuluan autorin e dyshuar për vrasjen e 19-vjeçarit në Shkodër
• “Dua drejtësi e mbrojtje nga shteti”, reagon nëna e 19-vjeçarit që u vra në Shkodër
• Vrasja e 19-vjeçarit në Shkodër, kush është personi për të cilin dyshon policia