1600 pasuri regjistrohen në emër të pronarëve në Gjoricë

Procesi i legalizimeve, këtë herë ka vijuar në Bulqizë. Drejtori i Kadastrës Shqiptare Artan Lame, kryetari i Bashkisë Bulqizë Lefter Alla dhe shefi i zonës së Bulqizës Albjon Gjimo, ishin të pranishëm në dorëzimin e certifikatave të pronësisë së tokave bujqësore dhe banesave.

“Zyra që mbulon Gjoricën është Bulqiza, është zyrë e Kadastrës jo drejtori ka bërë të gjithë dokumentacionin së bashku me drejtorinë që është në Dibër. Arritëm te kjo dita e sotme”- tha Artan Lame, Drejtori i Kadastrës Shqiptare

Procesit të certifikimit ju nënshtruan rreth 1100 parcela bujqësore, si edhe rreth 500 objekte, banesa, magazine.

Regjistrimi fillestar u mundësua përmes marrëveshjes së përbashkët Bashki-Kadastër, sipas së cilës Bashkia prokuron punimet dhe matjet fushore, ndërsa Kadastra merr përsipër prodhimin e produktit hartografik dhe certifikimin e tij.

“Kërkesat ishin si për leje ndërtimi, si për transaksione si për shitje, por që nuk do të realizoheshin nëse nuk do të kishim një pronësi”- tha Lefter Alla.

Alla premtoi se do të ketë një “One Stop Shop” që do ju vijë në ndihmë qytetarëve për të aplikuar dhe për të dhënë suport për çfarë nevojë kanë ata kundrejt institucioneve të tjera dhe bashkisë.

LEXONI GJITHASHTU: 

• Hetim për Kadastrën e Tiranës pas deklaratave të Artan Lames
• Aplikim elektronik për pronat, dokumentet nga Kadastra do të merren tek noteri