Aventura e re e Kallakut,  mesfushori: Zgjodha Kroacinë, pasi e shoh si një trampolinë

Sherif Kallaku do të luajë edicionin e ardhshëm në kampionatin kroat me skuadrën e Lokomotivës së Zagrebit. Sezoni i fundit me durrsakët ishte i shkëlqyer për 22-vjeçarin, i cili shënoi 14 gola në 32 ndeshje, duke bindur nënkampionët e Kroacisë për aftësitë e tij. Kallaku e mbylli aventurën me Teutën duke fituar Kupën e Shqipërisë, sukses që për të do të thotë shumë.

“Jam shumë i lumtur që e realizuam objektivin për të arritur në Kupat e Evropës. mendoj se kemi zhvilluar një sezon shumë të mirë. Jam krenar që isha pjesë e ekipit durrsak dhe shpresoj e i uroj më të mirat. Ndoshta një ditë mund të na rikthejë sërish fati, por uroj të jetë një ditë e largët që dhe unë të jem i lumtur”, tha ai.

Nga Laçi, te Teuta dhe tashmë në elitën kroate, vetë Kallaku tregon arsyet se pse bëri këtë zgjedhje.

“Normalisht zgjodha Kroacinë, duke marrë parasysh që është një trampolinë shumë e mirë. Kam folur dhe me Uzunin që e kam shok e luan atje, po ashtu dhe me Tucin dhe djemtë e tjerë shqiptar dhe mendoj se është një kampionat që më përshtatet. Nuk zgjodha anën financiare, pasim und të prisja për diçka më të mirë, por zgjodha një ekip ku mund të punoj dhe mund të shkoj më lart”, tha Kallaku.

Teuta do të përfitojë 150 mijë euro nga ky transferim, ndërsa do të mbajë dhe 10% të kartonit të lojtarit.