Macron në Bejrut, presidenti francez premton mbështetje për ish-koloninë

Presidenti francez Emmanuel Macron mbërriti të enjten në Bejrut, me qytetin ende të tronditur nga shpërthimi i fuqishëm i dy ditëve më parë.

Macron u prit në aeroport nga homologu libanez Michel Aoun.

Franca ka kërkuar mbështetje për ish-koloninë e saj dhe po dërgon ndihma pas shpërthimit, që ka lënë të paktën 145 të vdekur dhe mbi 5 mijë të plagosur.

“Së pari kam ardhur për të treguar mbështetjen, miqësinë dhe solidaritetin vëllazëror për qytetarët libanezë pas shpërthimit të 4 gushtit, që preku të gjithë Bejrutin dhe gjithë popullsinë. Mbi të gjitha do të theksoja se mbështetja dhe solidariteti janë të nevojshëm sepse bëhet fjalë për Libanin, për Francën, dhe është detyra ime të jem këtu dhe të tregoj miqësinë”, deklaroi Macron. 

La Fraternité, la Solidarité, sont au cœur de notre Nation. https://t.co/5nS3Zgoy1f

— Emmanuel Macron (@EmmanuelMacron) August 6, 2020

Më pas Macron ka vizituar edhe vendin e ngjarjes pranë portit të kryeqytetit libanez, që u shkatërrua nga shpërthimi.

Përveç viktimave dhe të lënduarve të llogaritur deri tani, disa dhjetëra persona konsiderohen ende të humbur dhe deri në 250 mijë të tjerë kanë probleme me banesat pasi vala e shpërthimit theu xhamat e dritareve dhe dëmtoi orenditë, duke i bërë shtëpitë të papërshtatshme për të jetuar.