Dialogu Kosovë-Serbi, ministri i AAK-së në qeveri kritika Avdullah Hotit

Në mes të debatit për shkelje të territorit të Kosovës nga xhandarmaria serbe, ministri i Drejtësisë në Kosovë, Selim Selimi ka shprehur rezervat e tij ndaj kryeministrit Avdullah Hoti në lidhje me rifillimin e procesit të dialogut me Beogradin.

 Ai thotë se kreu i qeverisë e ka shmangur nga takimi që ka pasur me Vuçiç.

“Unë nuk kam qasje direkte të informatave. Unë i besoj skriptes edhe pozicionit të delegacionit atje, por mua më pamundëson informimi i saktë në qoftë unë nuk jam pjesë përbërëse e atij ekipi, pasi që përtej atij skripti ka çështje të tjera të cilat po ashtu janë shumë të rëndësishme. Çështje të tjera të cilat mund të konsiderohen finesa, por janë të rëndësishme për pozicionimin e secilit delegacion”, thotë ai.

Selimi thotë gjithashtu se përjashtimi i tij nga këto takime, e bën të pasigurt nëse në këto diskutime që zhvillohen në Bruksel po realizohet qëllimi i 17 shkurtit 2008, kur Kosova u shpall e pavarur.

“Mendoj që kjo diskrepancë në mes takimeve, mua nuk më jep siguri të mjaftueshme për t’i përmbushur tërë ato pjesë të puzzles së mozaikut.Të qenurit selektiv në takime nuk të jep brumë të mjaftueshëm për me marrë një qëndrim mirë të informuar”, theksoi Selimi. 

Ministri i Drejtësisë thotë se të gjitha partitë aleate në qeverisje duhet të kenë pjesëmarrje të barabartë në dialog.

Ai gjithashtu ka kritikuar emërimin e Skënder Hysenit si negociator të qeverisë për dialogun, duke theksuar se procesi po kthehet në teknik më shumë se politik, ndërsa është koha që Serbia ta njohë Kosovën.