Ulja e infektimeve me COVID, bie interesi i qytetarëve për t’u vaksinuar

Me rënien e infektimeve nga virusi COVID-19 në vendin tonë interesi i qytetarëve për t’u vaksinuar ka rënë.

“E kam kaluar një herë. Mbaj edhe maskën, por e shikoj që nuk ka ndonjë gjë”, thotë një qytetare.

Një gjë e tillë reflektohet tek Qendra Shëndetësore nr.1 në Tiranë ku gjatë një dite paraqiten 6-10 qytetarë për t’u vaksinuar, krahasuar me periudhën qershor-korrik ku numri i vaksinimeve ditore shkonte nga 30 deri në 40.

“Flasim për shtatorin ka pasur një rënie të interesit të vaksinimit, kjo ndodh për shkak  që numri i pacientëve COVID është në rënie. Numri mesatar shkon 6-7 persona për Qendrën Shëndetësore ka raste që ka edhe 10-12, por që shikohet një rënie e interesit të vaksinimit”, thotë  Emanuela Brama, vaksinatore.

Aktualisht në vendin tonë rezultojnë 509 qytetarë aktivë me virusin COVID-19. Ndërsa në spitalin Covid-3 po marrin trajtim 5 pacientë. Që prej nisjes së pandemisë sipas Ministrisë së Shëndetësisë raportohet se kanë humbur jetën 3.589 qytetarë.

LEXONI GJITHASHTU:

48 të infektuar, asnjë humbje jete nga COVID-19 në Shqipëri

Rregullat e COVID në Kupën e Botës, Katari do kërkojë testet negative dhe maska