Hong Kong, hyn në fuqi ligji kinez; pranga manjatit të medias

Manjati i mediave në Hong Kong, Jimmy Lai është arrestuar nga policia nën dyshimin e pleksjes me forca të huaja.

Bëhet fjalë për arrestimin e parë VIP që bëhet në kuadër të ligjit të ri kombëtar mbi sigurinë, të miratuar nga Pekini e që përfshin ish-koloninë britanike.

Lai ka qenë një nga aktivistët më të spikatur pro-demokracisë në rajonin autonom kinez dhe njëkohësisht një kritik i theksuar i Pekinit, që imponoi ligjin e ri më 30 qershor, duke marrë kritika të shumta nga vendet perëndimore.

Ligji i ri mbi sigurinë ndëshkon çdo gjë që Kina konsideron rrezik për përmbysje të regjimit të saj, ndikim në shkëputjen e Hong Kongut, apo bashkëpunim me forcat e huaja; krime këto që shoqërohen me burgime të përjetshme.

Kritikët thonë se ligji do të dëmtojë liritë në qytetin gjysmë autonom, ndërsa mbështetësit e tij deklarojnë se ai do të sjellë stabilitet pas protestave të tejzgjatura të vitit të kaluar.

Ndërkohë, policia kineze nuk ka bërë ende një koment mbi arrestimin.

Jimmy Lai ishte arrestuar edhe më herët gjatë vitit, së bashku me aktivistë të tjerë, për lidhje me protestat pro-demokracisë.