Milionat pas kullave, në 2 vjet mbi 600 mln euro vlera e lejeve të dhëna në Tiranë

Vlera e lejeve të ndërtimit të dhëna në Tiranë përgjatë dy viteve 2020 dhe 2021 arrin në rreth 800 milionë euro.

327 milionë euro është vlera e atyre të dhëna në 2020 dhe rreth 470 milionë euro e lejeve të dhëna në 2021.

600 milionë euro përllogaritet shuma e investimit për godina shumëkatëshe, si për banim ashtu edhe për hoteleri, qendra tregtare apo aktivitete të tjera biznesi.

Në total, Bashkia e Tiranës ka dhënë 201 leje ndërtimi gjatë vitit 2020 dhe 218 leje gjatë vitit 2021. Numri i lejeve ka pak diferencë, por ajo që ka diferencë është sipërfaqja totale për ndërtim.

Në 2020, sipërfaqja ishte rreth 1 milionë e 120 mijë metër katrorë, ndërsa në 2021 ajo kapërceu në 1 milionë e 650 mijë. Diferenca prej 530 mijë metrash katrorë më shumë ndërtim në 2021 se në 2020 sugjeron se në 2021-shin numri i lejeve për kulla shumëkatëshe ka qenë më i lartë.

Sipas një raporti të Co-Plan, Bashkia e Tiranës ka arkëtuar vetëm nga taksa e ndikimit në infrastrukturë rreth 51 milionë euro në 2020. Në 2021, shifra përllogaritet në rreth 65-70 milionë euro. Në total, arkëtimet nga kjo taksë shkojnë për të dyja vitet rreth 120 milionë euro.

LEXONI GJITHASHTU:

• Kullat e Tiranës, 13 godina shumëkatëshe brenda unazës
• Tjetër kullë në Tiranë, projekti danez fiton konkursin, ku do ngrihet ndërtesa