Kërcënon Lukashenko: Opozita do të përballet me akuza penale. Protesta në mbështetje të presidentit

Pas vendimit të liderëve të BE-së për të mos njohur zgjedhjet presidenciale në Bjellorusi dhe për të ndërmarrë shume shpejt sanksione, me qindra protestues mbushën rrugët e Minskut e jo vetëm, në mbështetje të presidentit Lukashenko, i cili po përballet me sfidën e tij më të madhe në 26 vite qeverisje.

Duke mbajtur në duar flamuj të Bjellorusisë, përkrahësit e Lukashenko brohorisnin emrin e tij. Disa prej tyre mbanin në duar pankarta ku lexohej: “Lukashenko ec më tej, njerëzit janë me ty”.

Pas zgjedhjeve presidenciale të 9 gushit ku Lukashenko siguroi 80 % të votave, protesta masive shpërthyen në vend duke i konsideruar zgjedhjet të manipuluara.

E ndërsa BE kërkon një tranzicion paqësor në Bjellorusi, presidenti Lukashenko paralajmëron se do të ndërmarrë hapa të rinj të ashpër kundër demonstruesve që sfidojnë zgjatjen e sundimit të tij 26-vjeçar dhe akuzoi Perëndimin për nxitje të trazirave ndërsa kërkoi të konsolidojë kontrollin e tij të pushtetit.

Lukashenko paralajmëroi se aktivistët e opozitës që krijuan një këshill për të negociuar një tranzicion dhe zgjedhje të reja mund të përballen me akuza penale.

Ai urdhëroi agjencitë e sigurisë të rivendosin rendin në rrugë – një lëvizje që mund ti paraprijë një aksioni të ri kundër protestuesve, që kontestojnë rezultatin e zgjedhjeve.