Diskriminimi i shqiptarëve në Serbi, Sinani: Tregoni që ekzistojmë

Regjistrimi i popullsisë në Serbi po shoqërohet me probleme në Luginën e Preshevës. Në Medvegjë janë vetëm tre regjistrues me etni shqiptare, të cilët po marrin pjesë në procesin e regjistrimit të popullsisë.

As këta tre shqiptarë nuk po dërgohen në vendbanimet shqiptare, por në dyert e tyre po trokasin regjistrues serbë.

Përfaqesuesit politikë të Luginës së Preshevës kanë ngritur shqetësimin se kjo është në kundërshtim me marrëveshjen që është bërë në ndërmjetësim me OSBE-në.

Ndryshe nga Medvegja, në Preshevë dhe Bujanoc shumica e regjistruesve janë shqiptarë. Por në Medvegjë eshtë kryer edhe pasiviteti më i madh i adresave, duke ndryshuar në letër përbërjen e popullsisë atje.

Këshilltarja e kryeministrit të Kosovës për Luginën e Preshevës, Ardita Sinani u ka bërë thirrje qytetarëve shqiptarë të Medvegjës dhe të gjithë Luginës të bëhen pjesë e procesit për regjistrimin e popullsisë civile që po zhvillohet në Serbi.

Ajo vizitoi Medvegjën, ku u takua me qytetarët dhe përfaqësuesit e Këshillit Kombëtar Shqiptar.

Sinani ka thënë se regjistrimi është i rëndësishëm edhe si kundërpërgjigje ndaj diskriminimit të vazhdueshëm të shqiptarëve në Luginë.

“Tregoni që ne jemi, ekzistojmë dhe do të jemi këtu gjithmonë në trojet tona”, shtoi Sinani.

Regjistrimi i popullsisë për shqiptarët në Serbi po bëhet pas dy dekadave. Shqiptarët e Luginës së Preshevës nuk kanë marrë pjesë në regjistrimin e popullsisë që u organizua në vitin 2011, për shkak se nuk u respektuan kërkesat e tyre.

Në regjistrimin e fundit të popullsisë të vitit 2002, ku shqiptarët morë pjesë, janë evidentuar 56 mijë banorë.