Shtyhet takimi në Shtëpinë e Bardhë mes kryeministrit Hoti dhe presidentit serb Vuçiç

Takimi i parashikuar mes Kosovës dhe Serbisë do të mbahet më 4 shtator në Shtëpinë e Bardhë dhe jo më 2 shtator siç ishte parashikuar fillimisht. 

Lajmi konfirmohet për Euronews Albania nga zëdhënësi i Këshillit të Sigurisë Kombëtare John Ullyot. 

“Ne besojmë se përparimi në çështjet ekonomike, përfshirë krijimin e vendeve të punës dhe përshpejtimin e rritjes ekonomike, është hapi i parë drejt përparimit të procesit të paqes”, shkruhej në deklaratën e tyre. 

Kosova dhe Serbia me ndërmjetësimin e Shteteve të Bashkuara më 4 shtator pritet të formalizojnë tri marrëveshje, të cilat sipas ekspertëve janë thelbësore dhe strategjike për zhvillimin ekonomik mes dy shteteve.

Takimi në Shtëpinë e Bardhë synon që pas 10 muajsh ndërmjetësim nga i dërguari i Trump për dialogun, Richard Grenell, Kosova dhe Serbia të arrijnë dakordësinë dhe t’i hedhin në letër marrëveshjet për linjën ajrore, hekurudhore dhe për autostradën.

Kryeministri Avdullah Hoti, ka thënë se Kosova nga dialogu kërkon njohjen e pavarësisë nga Serbia, ndërsa ka hedhur poshtë idenë e shkëmbimit të territorit.

Nga ana tjetër, presidenti serb Aleksandar Vuçiç procesin e dialogut e ka cilësuar të vështirë pasi sipas tij, të gjithë duan që Serbia të “njohë pavarësinë e Kosovës”. 

Lexoni gjithashtu:

Tri marrëveshje ekonomike Kosovë-Serbi pritet të konkretizohen gjatë takimit në SHBA

Takimi i liderëve të koalicionit, Haradinaj: Takimi i së hënës është përgatitje dhe konsultë para 2 shtatorit

Pritjet nga dialogu Kosovë-Serbi janë modeste

Dialogu në Uashington, Haradinaj thirrje Hotit: Këtë herë trego qasje serioze