KQZ certifikon rezultatin përfundimtar të zgjedhjeve në Kosovë

Komisioni Qendror i Zgjedhjeve i Kosovës ka certifikuar rezultatin e zgjedhjeve të parakohshme parlamentare të 6 tetorit. KQZ e ka nisur mbledhjen me një minutë heshtje në nderim të viktimave nga tërmeti në Shqipëri.

Kryetarja e KQZ-së, Valdete Daka tha se certifikimi i rezultateve të zgjedhjeve vjen pas konfirmimit nga PZAP dhe Gjykata Supreme se nuk ka ankesa apo çështje që ndikojnë në rezultatin final.

Në bazë të këtyre rezultateve LVV, si parti e para në këto zgjedhje, ka marrë 221.001 vota (26,270%), LDK e dyta me 206.516 vota (24,548%), PDK e treta me 178.637 vota (21,234%), koalicioni AAK-PSD 96.872 vota (11,515%), ndërsa zyrtarisht koalicioni Nisma-AKR-PD e ka kaluar pragun duke marrë 42.083 vota, apo në përqindje 5,002%.