Po transportonte familjen afgane drejt Kosovës për 1 mijë euro, në pranga 52-vjeçari nga Korça

Një 52-vjeçar është vënë në pranga nga policia e Elbasanit me akuzën e dhënies së ndihmës për kalim të paligjshëm të kufirit kundrejt fitimit.

Burime nga policia lokale bëjnë me dije se në aksin rrugor Librazhd-Elbasan, shërbimet e Policisë kapën në flagrancë shtetasin F.K., 52 vjeç, banues në Korçë, i cili transportonte një familje me 5 pjesëtarë nga Afganistani , të cilët i kishte marrë në Korçë dhe po i transportonte në drejtim të kufirit të Kosovës, kundrejt fitimit 200 euro për person.

Në përfundim të veprimeve u bë arrestimi në flagrancë i shtetasit F.K, për veprën penale “Ndihma për kalim të paligjshëm të kufirit, kundrejt fitimit dhe materialet i kaluan Prokurorisë së Rrethit Gjyqësor Elbasan, për veprime të mëtejshme.