Barcelona-Messi pa marrëveshje, babai i argjentinasit: Vështirë të qëndrojë

Barcelona dhe Lionel Messi duken çdo ditë e më larg. Mediat spanjolle raportojnë se takimi mes babait të futbollistit dhe presidentit të Barcelonës Josep Maria Bartomeu është mbyllur pa marrëveshje dhe tashmë mes palëve ka nisur një “lojë shahu”.

Nga njëra anë kemi vendimin e Messit për t’u larguar, pavarësisht se ka edhe një vit të mbetur në kontratë, ndërkohë që në krahun tjetër kemi dëshirën e Barcelonës për të mbajtur futbollistin në skuadër madje në tavolinë është hedhur edhe opsioni për ripërtëritjen e kontratës edhe me dy sezone të tjera.

Tabloja është kjo dhe me sa duket asnjëra palë nuk ka në plan të lëshojë pe.

Në përfundim të takimit Jorge Messi, babai i sulmuesit, u shpreh se duket e vështirë që lojtari të qëndrojë tek Barcelona. Megjithatë në takimin e zhvilluar ditën e djeshme presidenti i Barcelonës Bartomeu u paraqit pa një avokat gjë që nënkupton se klubi i Barcelonës është në terren më të qëndrueshëm se sa Messi.

Për argjentinasin vijon të jetë në fuqi klauzola e largimit prej 700 milionë eurosh dhe pavarësisht dëshirës së tij largimi nga spanjollët nuk duket edhe aq i lehtë.

“Pas dere” po pret Manchester City por “The Cityzens” janë të gatshëm ta marrin lojtarin vetëm në rast se ai largohet nga klubi me parametra zero, pasi në të kundër një operacion i tillë financiar është i vështirë për ta.