Dekonspiroi operacionin për ekstradimin e Licit, pezullohet sekretarja e prokurorisë

Sekretarja e Prokurorisë së Shkodrës me inciale K.G, është pezulluar nga detyra pasi dekonspiroi operacionin për ekstradimin e Ibrahim Licit.

Sekretarja e Prokurorisë së Shkodrës është nën hetim për ‘zbulimi i akteve ose të dhënave sekrete’.

“Si rezultat i hetimeve të deritanishme, janë grumbulluar të dhëna që tregojnë se shkresa e publikuar në media është fotografuar fillimisht nga shtetasja K.G., me detyrë sekretare në Seksionin e Ekzekutimeve dhe Marrëdhënieve Juridiksionale me Jashtë në Prokurorinë pranë Gjykatës së Shkallës së Parë Shkodër, e më pas kaluar nga aparati i saj celular, shpërndarë dhe publikuar në media. Ndaj shtetases K.G., është marrë menjëherë masa e ndërprerjes së marrëdhënieve të punës në prokurori, ndërkohë që po procedohet edhe penalisht për kryerjen e veprës penale “Zbulimi i akteve ose të dhënave sekrete”, parashikuar nga neni 295/a i Kodit Penal”, thuhet në njoftim.

Gjithashtu, vijojnë hetimet për zbulimin dhe identifikimin e personave të tjerë të përfshirë në këtë ngjarje.

Interpol Tirana i ka kërkuar Prokurorisë së Shkodrës dosjen e Ibrahim Licit me qëllim përgatitjen e kërkesës për ekstradimin e tij nga Turqia, ku ndodhet aktualisht.

Në një deklaratë për mediat nga Turqia Lici, pak ditë më parë hodhi poshtë lajmin se ai është arrestuar ditët e fundit.

Lici ka hedhur poshtë edhe dyshimet e ngritura ndaj tij për vrasjen e Endri Mustafës duke deklaruar se kamerat e sigurisë dhe qelizat telefonike vërtetojnë sipas tij se ka qenë në Tiranë në momentin e vrasjes.

LEXONI GJITHASHTU:

• Zbardhet shkresa, Shqipëria kërkon ekstradimin e Ibrahim Licit nga Turqia
• Në kërkim për vrasjen në Shkodër, Ibrahim Lici mesazh nga Turqia
• Zbardhet vrasja e 32-vjeçarit në Shkodër, shpallet në kërkim Ibrahim Liçi, arrestohen 2 bashkëpunëtorët