Ofendoi marokenët, politikani holandez dënohet nga gjykata

Një gjykatë apeli në Holandë la në fuqi vendimin e shkallës së parë ndaj politikanit të së djathtës ekstreme, Geert Wilders, e cila e shpalli fajtor pasi ofendoi marokenët gjatë një takimi zgjedhor në vitin 2014.

Megjithatë, gjykata e ktheu vendimin e masës ndëshkimore për nxitje diskriminimi. Wilders mund ta apelojë vendimin te Gjykata e Lartë.

“Komentet e Wilders-it mund të kontribuojnë në polarizimin e shoqërisë holandeze, ndërkohë që për shoqërinë pluraliste e demokratike, respekti për të tjerët, sidomos për pakicat, ka rëndësi shumë të madhe”, tha gjykatësi Jan Maarten Reinking.

Politikani i ekstremit të djathtë e ka ngritur karrierën kryesisht nëpërmjet retorikës kundër myslimanëve. Në vitin 2016  u shpall fajtor për një fyerje dhe nxitje diskriminimi ndaj marokenëve që e kishte kryer në vitin 2014, por nuk mori dënim.

“Partia për Liri”, e themeluar prej tij, këmbëngul që është i pafajshëm dhe gjyqin e ka quajtur të motivuar politikisht, një përpjekje për t’i mbyllur gojën e për të sulmuar të drejtën e fjalës.

Fyerja në fjalë, e ndodhur në vitin 2014, ndodhi kur Wilders i pyeti mbështetësit gjatë një takimi zgjedhor nëse donin më shumë apo më pak marokenë në Holandë. Kjo pyetje bëri që përgjigjja t’i vijë me brohoritjet “Më pak! Më pak”, të cilave ai iu përgjigj me fjalinë “Do ta zgjidhim ne”.

Ky vendim u mor nga gjykata gjashtë muaj para se të mbaheshin zgjedhjet parlamentare në Holandë. Sipas sondazheve, partia e Wilders-it është më e madhja në opozitë.