Shkodra në sytë e blogeres sllovake, Alexandra tregon eksperiencën në Shqipëri

Alexandra Kovaçova është blogere e njohur në Sllovaki, e cila udhëton e vetme në vende të ndryshe të botës.

Në blogun e saj dedikuar vendeve turistike ka mbi 1300 artikuj.

Alexandra ka vizituar më shumë se 60 vende të botës. Dëshira e saj është eksplorimi dhe Shkodra ishte destinacioni i radhës.

“Zgjodha Shkodrën pasi isha në Mal të Zi. Kam dëgjuar për Tiranën dhe jugun e Shqipërisë që shumë blogerë e kanë vizituar. Për momentin jam vendosur në Shkodër dhe po e shijoj shumë. Vërtet ndihem si në shtëpi”, thotë blogerja.

Në Shkodër është përshtatur shumë mirë, por të qenët vegane e ka kushtëzuar pak.

“Pëlqej shumë frutat dhe këtu i gjen të freskëta, natyrën dhe liqenin i adhuroj. Kaloj shumë kohë jashtë në natyrë, pasi nuk më pëlqen të shoqërohem me njerëz. Prej 9 vitesh jam kthyer në vegane dhe kam probleme me ushqimin në restorante, sepse jo të gjithë e ofrojnë, sidomos këtu në Shkodër”, shprehet sllovakja.

Ajo nuk konsumon alkool dhe kafe. Madje, gjatë ditës praktikon joga në natyrë.

“Dua të shijoj natyrën në maksimum, nuk më pëlqejnë ditët e njëjta, kafe, alkool nuk i përdor. Ajo që më mbush gjatë ditës është joga”, thotë ajo.

Si turistë në Shkodër, Alexandra liston të metat e qytetit. Për të potenciali i qytetit është i pashfrytëzuar dhe keqpërdoret.

“Transporti është katastrofë, për turistët orientimi është i pamundur. Më duhet të shkoj në Kosovë për të marrë avionin për në Shkup dhe nuk di me çfarë të shkoj. Një tjetër gjë që më bën përshtypje janë zyrat e informacionit, që në të vërtet nuk bëjnë punën që u takon. Ka dhe abuzime me çmimet, ndryshojnë çdo ditë”, shprehet Alexandra.

Parë në këndvështrimin e turizmit, Shkodra këtë vit priti më shumë turistë të huaj se viti 2021, por ende nuk ka një shifër të saktë për numrin e vizitorëve.

LEXONI GJITHASHTU:

• Turizmi malor, Malësia e Madhe ndër vendet e preferuara për turistët e huaj
• Ka 1 arsye pse hotelierët preferojnë turistët shqiptarë