Kryeministri Avdullah Hoti njofton takim me Sekretarin e Përgjithshëm të NATO-s

Pas nënshkrimit të marrëveshjes për normalizimin e marrëdhënieve ekonomike mes Kosovës dhe Serbisë në Shtëpinë e Bardhë, kryeministri Avdullah Hoti, thekson se do të vijojë sërish takimet e nivelit të lartë në Bruksel.

Me një shënim në faqen e tij zyrtare në “Facebook”, z. Hoti bën të ditur se të martën do të takojë sekretarin e përgjithshëm të NATO-s, Jens Stoltenberg.

Kryeministri Hoti shton se shtetit i Kosovës është i bekuar falë miqve në të dyja anët e Atlantikut. .

“Të martën, në selinë e NATO-s në Bruksel, takohem me Sekretarin e Përgjithshëm të NATO-s, Jens Stoltenberg, të cilin e falënderoj për gatishmërinë. Kosova është e bekuar me miqtë e saj, në të dy anët e Atlantikut”, shkruan Hoti.

Të premten më 4 shtator, Kosova dhe Serbia nënshkruan marrëveshjet ekonomike nën vëzhgimin e presidentit të Shteteve të Bashkuara të Amerikës, Donald Trump. Ky i fundit i përgëzoi palët, ndërsa nënshkrimin e marrëveshjes e cilësoi si historike.