Nju Delhi mbyll shkollat ​​për shkak të ndotjes së ajrit

Shkollat ​​fillore në Nju Delhi do të mbyllen nga e shtuna, ndërsa po merret parasysh edhe kufizimi i qarkullimit rrugor, pasi niveli i ndotjes së ajrit në kryeqytetin e Indisë është ende i lartë, njoftuan sot autoritetet.

Përqendrimi i grimcave PM 2.5 që vendoset në mushkëri në Nju Delhi është shumë më i lartë se udhëzimet e sigurisë të Organizatës Botërore të Shëndetësisë (OBSH), me shifra të regjistruara në shumicën e stacioneve matëse afër ose mbi 400, që është në kategorinë e “ndotje e rëndë” ose “e rrezikshme”, raporton Reuters.

“Duke filluar nga nesër mbyllim të gjitha shkollat ​​fillore në Nju Delhi. Po anulojmë edhe aktivitetet e shkollave në natyrë”, njoftoi ministria përkatëse në një konferencë për shtyp, duke theksuar se po shqyrtohen kufizimet në qarkullimin rrugor për shkak të ndotjes.

Vendimi për mbylljen e disa shkollave erdhi pasi prindërit e shqetësuar dhe ambientalistët dolën në mediat sociale për t’u bërë thirrje autoriteteve të marrin në konsideratë ndikimin e ndotjes tek fëmijët.

Zyrtarët në Noida, një periferi e Nju Delhit, urdhëruan të enjten të gjitha shkollat ​​të mbajnë klasa në internet për studentët deri në klasën e tetë.

Nju Delhi është një qytet me rreth 20 milionë banorë dhe kryeqyteti më i ndotur në botë.

LEXONI GJITHASHTU:

• Ndotja e ajrit shkakton kancer tek joduhanpirësit, sipas studimit
• Ndotja e ajrit shkaktoi globalisht 1 në 6 vdekje në 1 vit, sipas studimit