Biznesi i shërbimit në Korçë i prekur nga pandemia, kërkojnë rikthimin në ambientet e brendshme

Sipas një studimi të Bankës Botërore, 61 për qind e bizneseve në Shqipëri, rezultuan jofitimprurëse dhe pas lehtësimit të masave anti-COVID. Efektet e krizës së shkaktuar nga pandemia po ndihen dhe në bizneset e qytetit të Korçës.

Një ndër problemet kryesore të këtyre bizneseve është se shumica e shërbimit është ndërtuar për mjedise të brendshme, ndërkohë që ende vazhdon të jetë në fuqi akti normativ për ndalimin e shërbimit në mjedise të mbyllura.

“Restoranti që mund të shihni pas meje ka vetëm tre tavolina jashtë ndërkohë që 90 për qind e shërbimit tjetër kryhet brenda, nëse do të vijojë të vazhdojë të jetë në fuqi akti normativ, ky restorant do të ndalojë së funksionuari”, – tregoi nga Korça korrespondenti i Euronews Albania, Xhensil Shkëmbi.

Elona Taçe, pronare e një biznesi hotelier në Korçë tregon se ende puna nuk është normalizuar, teksa si një ndër shkaqet sheh dhe mungesën e festave të përvitshme që sillnin me mijëra turistë në qytetin juglindor.

“Korça ka një sërë aktivitetesh dhe festash që janë një atraksion për turistët. këtë vit nuk patoi asnjë festë dhe kjo ndikoi në këtë situatë”, shprehet ajo.

Situatë paraqitet e vështirë edhe në lokalet, baret e restorantet e qytetit të cilat kanë një punë minimale, krahasimisht me një vit më parë. 

Menaxheri i një prej lokaleve në qytet tregon se në rast se instancat nuk do të lejojë izolimin e jashtëm për ngrohje, biznesi ku ai punon do duhet të mbyllet.

 “Kur të vijë dimri do të jetë e vështire sepse nuk na lejohet të mbyllim pjesën e jashtme, nëse nuk na lejohet të punojmë brenda do të mbyllemi”, thotë Renato Tahip, menaxher lokali.

Përfaqësuesit e biznesit sugjerojnë tolerim për bizneset që punojnë në ambiente të brendshme dhe rregulla të reja nga Ministria e Shëndetësisë.

 “Duhet toleruar pak edhe kjo pjesa e punës në ambientet e brendshme, sidomos qyteti ynë që është i ftohtë, ndoshta duhen rregulla të reja”, u shpreh Mimoza Kame, përfaqësuese e BID Korça.

Nëse protokollet anti-COVID nuk ndryshojnë, një numër i konsiderueshëm biznesesh në Korçë e kanë të pamundur të operojnë gjatë dimrit dhe do të detyrohen të mbyllin aktivitetin.

Lexoni gjithashtu:

Pandemia rriti informalitetin, 40% e lekëve jashtë bankave